لحظة هروب (8)

11-10-2009, 03:58

لحظة هروب (8)

يا بحر واسيتنى الليله دى مرتين
يسعد مساك
الله يزيدك من صفاه ويكون معاك
الله يزيدك من رضاه ويزيد رضاك
يا بحر لو تعرف بَكُون ازاى معاك
تفضل واخدنى ف موج عطاك
يسعد مساك
**
يا بحر لك وحشه إذا فارقتنى
لو مر يوم اسأل عليك ما جاوبتنى
ييجى المسا والليل فى حزنه يلفنى
والسهد فى الوحدة الكئيبه يْهِدِّنِى
وانده واقول ياللى بعيد عنى رضاك
يسعد مساك
**
يا بحر نادى لقلبى مره كل يوم
خلينى لما الليل يلالى يجينى نوم
اغسل شقايا ، ابعت هنايا مع النجوم
خلينى يا بحر ف هناك انزل واعوم
وف موج حنانك أغتسل وارمى الهوم
وابعت واقولك من هنا لغاية هناك
يسعد مساك
**
يا بحر صوتك يسرى ف الليل الحزين
يفتح طاقات نور الصفا يداوى الأنين
ويفرج الكرب اللى كابس من سنين
على قلبى ويفجر عيون وجد وحنين
تلمسها فى همسة ندا تجاوب نداك
يسعد مساك
**
يا بحر بات قلبى الليله دى ف موج عبير
فَرْشِةْ حنانك موج نغم وخيوط حرير
والنسمه ناديه وميه جاريه فى الغدير
وزهور بتنده ع الفراش يطلع يطير
يفرد جناحه وييجى يتهنى بْلُقَاك
يسعد مساك
**
يا بحر قلبى من الرضا
طاير يرفرف فى الفضا
ناسى مآسى اللى مضى
ينده وبِيْرُدّ الصَّدَا :
يا للى لقيت فرحى معاك
يسعد مساك
**
يا بحر شوف من أد أيه
قلبى يناديك وتصد فِيْهْ؟
وف كل مره سألنى ليه
قلبك بيختار لى جفاك ؟
يسعد مساك
**
يا بحر لما الله أَذَنْ
من غير ما نسعى القلب حَنّْ
صرح وقالها فى العَلَنْ
الله يا بحر اللى ناداك
يسعد مساك
**
خلانى احس بلوعتك
وانْتَ تِحِسّ بلوعتى
جمع شقاك على حرقتى
وقَرَّبْ ضَنَاك من قَهْرِتِى
وبْقِيتْ تِرِقّ لْوِحْدِتِى
وبقيتْ اعيش حُزْنَك معاك
يسعد مساك
**
د. محمد عبد المطلب جاد
أستاذ سيكولوجيا الإبداع - جامعة طنطا

11-14-2009, 05:20

يا بحر لما الله أَذَنْ
من غير ما نسعى القلب حَنّْ
صرح وقالها فى العَلَنْ
الله يا بحر اللى ناداك
يسعد مساك

يسسسسسسسسلمو ع الكلمات الرائعه

11-14-2009, 09:50

لا حرمنى الله من طلتك
ترعاك عين الله

11-14-2009, 10:17

الف مبروووووووووووووووك يا دكتورنا العظيم

تستاهل وبحق حفظك الله لمنتدى نوارة ولمصر

ايها الشاعر العظيم انت عز لنا والله ما شاء الله عليك

11-14-2009, 05:49

سجل لمشاهدة الصور


	الف مبروووووووووووووووك يا دكتورنا العظيم تستاهل وبحق حفظك الله لمنتدى نوارة ولمصر ايها الشاعر العظيم انت عز لنا والله ما شاء الله عليك

اللهم لا تحرمنى حب هذا الرجل الذى أحبه فيك ودون أن أراه